Monday, February 16, 2009

سيبها ونام

عندي لقلبك كام هدية صغيرين
أول كلامي كام نَفَس
حطيت عليهم فرحتي ونفختهم فيك
لجل ما تطيب م البعاد
تاني كلامي حبتين مانجة وعنب
متعودين ناكل حلاوتهم سوا
ونخلي بذرتهم تنور ف العتاب
تالت كلامي خوف تهوّش ضحكتي
إياك تهوّش ضحكتي !
لساها طفرة بتنزوي لجلن تطيب
ماتت زمان
هتصير تراب
وتصير كما قال الكتاب
ضحكة بشر
أصل اللي كان قبلك بَشَر ضحكي وساب
والله ما ساب!


خليك كويس مثلما قلنا وطببني.. عليه وحده العوض
فـ ابقى العوض وحياة جمال وجه النبي
وابقى اللي طاف من أول البسمة اليمين
حتى الشمال
حبيت تتوه فـ اديتك المفتاح عشان
تعرف تعاود لما تخلص رحلتك
مش حِمل أصلا بهدلة بالله عليك
بتشيل عن الكتف الحمول
بالله تحاسب ع اللي فاضل بين صوابعي بيوجعوا
لفّت على ايديا الشنط واتكعبلت
مابقيتش عارفة اديك تشيل ولا عارفة اكمل ف المسير
ولا عارفة اكون صابرة ف سكات


طبّقني تطبيق الجنيه وادفعني واشرب حاجة ساقعة ورجّني
يمكن اكونلك نص ما يمكن تكون
وحياة غلاوتي ف عز ما بيغلى الدهب
اسمع كلامي مرة آه والتانية والعشرين وحق العِشرة لأ
لطشوا البصيرة من العينين
والقلب مكلوم م الوجيعة


لو شفت وش بنية نايمة بينتفض
ويقول كلام ما يخصهوش
ويزوم على اوجاع المشانق
يتسحب تحت الكلام
ويدوس بإيده كل حلم اتلف بشريطتين غلط
لو شفت ده
ملّس على عينيها ونشف دمعها وسيبها
ونام


..