Saturday, September 29, 2007

عَبَط


يمكن عبيطة
شايفة السدود حوالينا
فينا/وبينا/منا
الدنيا غولة وبتلاحقنا
مسيّبة تعابين ف راسها بتحاوطنا
وفلوس/ مشاكل/ أهل/ شغل
خيوط حرير ومكتفينا
مقطّـ ـعينا
بيوجعوا !
لكن باهوّن
ماباخدش بالي م الحاجات دي عشان "مهمّة"!

لكن باحس بكسْر نفسي بالأوي
لما ألقى عينك ماتمَلتش بوشّي جامد
واتروت
لما الجواب يبقى على أد السؤال
مين قال أقولك "عامل ايه؟"
علشان تقول "فل وتمام" !
...........
لما آجي أوشوش قلبي عنك فانتفضْ
والاقيه يقول "ما سألش عنك من يومين!"
فـ أسند على قلبي المكسّر
واتهبد
فـ باحس كسْرة نَفسي جامد
مش بردو بـ"تحس" بوجع لما أتكسر؟ -
............
مش عايزة أزقّك ع الكلام
لكن كمان..
لما المشاعر تتكفي على وشها دلوقتي
بكرة هتبقى فين؟؟
لما يوماتي أمسك كلامك حرف حرف وأفتفته
هنا قال
هنا..
لازم أكيد كان راح يقول
وأدعك عينيا واقول ده أسبوع مش كتير!
وأكيد وحشته بس يعني....
.............
يمكن بواقي صافية جوايا
بتطرح لسه حاجة
صافية وبتلمع كده
زي البنات!
عايزاك تقرب - حتى لو ساكن بعيد -
تشتكيلي ومني ليا
وتبقى "حابب" تحكي حتى عن فطارك
تليفون طلبته من يومين
وقفل ف وشك – كان غلط -
عايزة أحس انك عايشني
بتصحى تمسك حاجة مني فايتاهالك
وتقول وحشتك بالغلط
يمكن.. عبط!
..............
ولا عشان معرفش أخبّي لومي جامد للي حباهم أوي
وعشان ما نفسي أفرح معاك
وكأني لسه عيّلة بتشتاق جواب متخبي جوا ديسك الفصل
جوا المدرسة
أو رنّة تيجي كل حبة تفوّق الوَحشة اللي متخبية فيا
مني "ليك"
بتقوللي فاكرك – مانساكيش-
مع إني مابَرنّش لحد!!
يمكن عبط؟
علشان بحبك بالأوي؟
يمكن غلط؟؟
.................
بازعل عشان بتغيب عليا بدون سبب
وأستنى منّك "إنتي فينك"
لما أغيب
وانا لجل خاطرك
لجل ما .. ما كسرش خاطري
راح أترجمها ل"بحبك"
روحي اتمَلت تعاوير ف بُعدك
وانت قادر تبقى جنبي!
وسؤال ف قلبك لو سمحت:
"بتقسى ليه؟"
فـ باحس كَسرْة نفسي جامد
مش بردو بتحس بوجع لما أتوجع أدام عينيك -
................
مين قال سؤالك عني حاجة مش مهمّة؟
وان كان عبط..
إيه راح يضرّك لو تحاسب لجل تفضل ضحكتي "اللي فاضلة"عالية؟
مش بردو بتـ ...-
لو تجاري عقل عيّل نفسه يلعب فوق كتافك
راح يقولوا قلبه طيب
مش عبيط !
======

عارف انت إيه وجعني رغم فرْحي لما شُفتك
بعد يوم أو كام سنة
- همّا كانوا أد إيه؟ -
لما ماسمعتش "وحشتيني أوي"
معلش سامحني
"عبط"
..

26 comments:

عالمى ازرق said...

لا مش عبط
كلماتك فى العاميه لاتقل جمالا عن الفصحى
يارب دايما تكونى بخير

عنتر بن غلبان said...

عارفة انا نفسي اقرا حاجة زي دي بقالي زمن
الحب ابسط من كل الكلام وانت خليتيني احس بكل نبضة وجع فيه
يمكن عبط؟


بوركت

إبـراهيم ... said...

حلوة قوووي قووووي يا رانيـــا :
............
مش عايزة أزقّك ع الكلام
لكن كمان..
لما المشاعر تتكفي على وشها دلوقتي
بكرة هتبقى فين؟؟
لما يوماتي أمسك كلامك حرف حرف وأفتفته
هنا قال
هنا..
لازم أكيد كان راح يقول
وأدعك عينيا واقول ده أسبوع مش كتير!
وأكيد وحشته بس يعني
******************
**********
****
ولا ما ينفعش نقول (حلوة) ، على كـل ما يبث هـذا الوجع، والإحسـاس !!
.
.
دمــتِ ... رانيـــا

غادة الكاميليا said...

مش عارفه أعلق ع القصيدة اللى دخلتنى ولا الوجع المتنطور بين الكلام
؟؟؟؟؟؟؟؟؟
رائعه الكتابة
ومؤلمة الحالة
أقل تفاصيل ممكن تسعدنا مش ممكن تتوصف بالعبط زى مهما فاكرين أقل وصف ليها البراءة
دمتى طيبة

نهى جمال said...

بازعل عشان بتغيب عليا بدون سبب
وأستنى منّك "إنتي فينك"
لما أغيب
وانا لجل خاطرك
لجل ما .. ما كسرش خاطري
راح أترجمها ل"بحبك"
روحي اتمَلت تعاوير ف بُعدك
وانت قادر تبقى جنبي!
وسؤال ف قلبك لو سمحت:
"بتقسى ليه؟"
فـ باحس كَسرْة نفسي جامد
مش بردو بتحس بوجع لما أتوجع أدام عينيك -


عايزة أعيط

بجد

ومش عارفه أقول ايه
وانتي عارفه ؟

moony said...

الله عليكى بجد..الله.. على فكرة .. لأ مش عبط .. دى بنوته مفيش زيها .. حساسة قوى مليانة رقة وحب .. وجعت قلبى ومسته .. ورسمت على وشى ضحكة حلوة .. كلامك فيه منى وحسيت انه طالع منك قوى ..بس قولى للبنوته دى .. تحافظ على كل الروعة اللى جواها دى للى يستحقها ,ولا انتى زى غاوية شقا؟؟
تعبيراتك بسيطة قوى .. بس السهل الممتنع فى الصميم وجميلة ومعبرة .. تسلم الروح اللى كتبت الجمال ده
عزيييييييييزتى دومى بكل الود.

محمد عبدالحي بتاع بيطري said...

أنا بصراحة ما كنتش جاي أعلق
أنا كنت جاي أعزمك على مدونة الأرض الخراب بعد ما كملت علشان تقوليلي رأيك

http://abdelhay-eliot.blogspot.com/

Ezz said...

لا مش عبط..

-----------
السطرين دول وجعوني أوي:

لما آجي أوشوش قلبي عنك فانتفضْ
والاقيه يقول "ما سألش عنك من يومين!"
فـ أسند على قلبي المكسّر
واتهبد
فـ باحس كسْرة نَفسي جامد
مش بردو بـ"تحس" بوجع لما أتكسر؟
------------

أكيد مش عبط..

عز

هدى said...

وحشتني قصايدك اللي بتخليني افكر انك شاعرة بجد

..اقولك سر

عبط

عبط

عبط

بس لابد منه

من غيره الحياة مالهاش طعم

كان نفسي اخد سطرين واقولك دول لمسوني
بس انا عايزة اخد القصيدة كلها واقولك وجعتني

..

تحياتي

logarithms said...

احساسها جميل جدا ...

رانيا منصور said...

عالمي أزرق..

مش عبط تفتكري؟؟ :)
كلامي بيبقى حلوة لما بيشوفك (ده بجد)
=================================

عنتر..

الحب ابسط من الكلام صحيح
بس الحب محتاج كلام أظن
و
يمكن
عبط !!

وبوركت يا افندم جدا.. منور
==================================

إبراهيم..

مش عارفة
عايز تقول عليها (حلوة)؟
يمكن..
المشكلة اننا جميعا بنحب الوجع واللي يقلبه علينا !
=================================

غادة..

أقل تفاصيل دي هي الحياة يا ادة
مش الأحداث الكبيرة أبداً هي اللي بتأثر فينا.. بالعكس.. اللي شايفينه هايف و (عبيط)هو اللي يا يبني.. يا يهد يكسر
وربك كريم وبيجبر
=================================

نهاي..

سلامة قلبك
هاقولك ايه ف العياط؟؟
بتتلككي بكلمتين احترت اكتبهم ولا لأ؟
القلب التعبان بيعرف يتصرف بأي كلمة "إزيك" ويعيط يا حبيبة
=================================

عين ضيقة said...

ايه الناس دى؟
مين قال ايه؟


شكرا يارانيا
القصيدة اكتر من رائعة
دا بجد
البساطة فى التعبير عن الاحساس اللى ابدا مش بسيط وكمه مش قليل
وحب كبير بجد
ومسك لقلب اللى بيحب بجد

هو الخسران

ياريته يقول بحبك

مش عبط لما تكونى انسانة اوى وبتحبى اوى
على فكرة
افضلى ترجميها لبحبك


انحناءة ليكى يارانيا

رانيا منصور said...

عدنا :)

moony..

يسلم قلبك يارب
القلب الحساس ورقيق وبيحب ده
بيتشخبط عليه كده يا حبيبة!

وزي ما قلنا
احنا بنحب الكلام اللي يفكرنا/يحسسنا/يقربلنا الوجع كأنه قال يعني بعيد!

سيبك انتي
منوراني..
.................................

محمد عبد الحي..

زيارة مش محسوبة
بس نورت بردو
.................................

عز..

السطرين دول (أوجع) سطرين
شاورت حلو جدا !

ونورتني يا افندم بجد :)
.................................

هدهد..

وحشتيني يابنتي
بس ايه ده ايه ده!!!
(سمايلي نرفوز بهزار)
قال تفكري شاعرة بجد قال
امال ايه مستورديني وركبوني هنا!

زوريني كتير
مودة يا مودة..
.................................

أسماااااااااااااء..
إزيك؟؟
تصدقي قلتي اللي انا عايزاه :(
مين قال ايه أصلا؟ ايه الناس دي!!

هو الخسران؟؟ حلوة دي وف الجووووووون
ههههههههههههههههه
بحب زيارتك والله
ماتحرميناش الطلة الحلوة يا مطر..

بياترتس said...

وجعتنى جدا او يمكن حركت جوايا اشتياقى للحب فتوجعت
جميله يارانيا

رانيا منصور said...

بياتريس..

سلامتك مِ الوجع يا جميلة
يسلم قلبك
منوراني

لا تغيبي.

المحرر said...

تظل الحكايات زاد أعمارنا
تفاصيلها محطات العابرين
بين أحزان تستطيل
هل يكون لنا سوى
أن فقط نثبت بعض تصاويرها المفرحة
لنحيا
متكئين على شرفات العمر
نبحث
عما أرخته أقلام الرصاص
وحكايات المساء
نعم
نحكى
لنبقى

وهل الحياة سوى حكايات صغيرة
تضمها دفاتر أعمارنا
استمتعت بهذا النص البازغ
كشرائط المساء الى أهواها
وهى تحتل منتهى الأفق
تحيتى

رانيا منصور said...

هشام..

وهل أقدر من التفاصيل
أن تترك للجروح ندوباً وعلاماتٍ واضحة للشمس؟

هي الذكرى تأكل من رؤوسنا
وتتركنا
بلا شيء غير فتات بين الكفوف
أو بين القلوب !

مودة..

حسن أمين said...

مطلوب مني بكلمات مستعجلة اني أعبر عن اللي حصل لي بعد سماع (مش قراية ) قصيدتك امبارح مع مغامير ..وكمان أوصف جمالها وصدقها .. وادافع عن حق الفتاة في احتكار مثل هذه المناطق ..لا طبعا ..مش هقدر ..سماح يا رانيا

ندى مجدي said...

الله
بجد لمستي فيا حاجات كان واحشني إن حاجة تلمسها
شكرا
رانيا هو أنا لحقتك في المغامير؟
سلام

Unknown said...

انا بجد بعد كل التعليقات اللى قريتها ده مش عارفه اقولك ايه غير بجد جزاكى الله خيرا فعلا عن كل الاحاسيس اللى انت عبرتى عنها بمنتهى البساطه والالم واللى وصلتلى من اول مرة سمعتها منك.ارجوكى تكملى كتابه الاحاسيس الحقيقيه ده اللى بتبقى جوا بنات كتير ومتعرفش تقولها او توصفها بمنتهى الرقه و الدقه والحس المرهف زيك كده

حمامة said...

مش عبط خاااااااااااالص
عجبتنى اوى دى
لما المشاعر تتكفي على وشها دلوقتي
بكرة هتبقى فين؟
حلوة اوى ورقيقه اوى زيك
تسلم ايدك يا فنانة :)

رانيا منصور said...

للجميع..

آسفة جداً ع التأخير
معرفتش ان في ردود غير بالصدفة أصلاً :(






..

حسن،
سماح دي مش فاهماها !
يعني حلو ولا نوت يعني ؟ :)

نوّرت والله
عن جد!

رانيا منصور said...

ندى هانم،،

منورة الدنيا
لحقتيني ازاي يعني؟
مفاهماش

ربنا يسلّم قلبك
..

رانيا منصور said...

فاطمة..

عارفة..
ساعات قدرتك ع وصف اللي حسّاه
بيقف عند مجرد "رصد"
يعني تعرفي تعملي ده من بعيد
لكن،
وصف الوجع بيدبّسه أكتر
فهمانة؟

نورتي،،

بيلادونا said...

مش عبط يا رانيا اننا نحب من كل قلوبنا
مش عبط لما نفرح بكل حاجة ولو صغيرة و بسيطة من اللي بنحبهم و نتمنى نكون جنبهم
مش عبط لما نحس ان قلوبنا ممكن تتجرح منهم لمجرد اننا مخطرناش على بالهم و لو لثانية واحدة
يسلم قلبك على رقة احساسه يا رانيا

Unknown said...

لأ بجد
لسة لما تسمعوها منها
حاجة تانية
ربنا يوفقك