Friday, November 9, 2007

معلش يا زَهر



عارف..

ولو انك مش عارف

في طوبة ف روحي بتتفتفت

مِتخَيّل روحي بقت فتافيت؟

مردومة الدنيا عليا عياط

بتنقّط جوا ضلوعي صريخ

فـ باوَطِّي الصوت

بامسك منْديل وَرَقُه مرطّب

وأدعك قلبيـ بِْحكَايات النور وأفضَل اطبطب

“إهدَى.. إهدَى”

وأدعك قلبك.. لساه مغيّم

هينوّر تاني أكيد لازم!

...

وأمسك ورقِةْ سلوفان بِتْوِش

تِتْلفّ ف إيدي وتصبح دايرةْ نور بتضُم

واتمنى انا وانت نكون جواها ف نُص القُطر

نخلّي معانا ديوان نقراه.. وشوية مَيَّة

علشان لو عِطشت جَنّتنا..

نسقيها.. نسقسق نواحيها

بتحب المشي؟ راح الفّ الدنيا على عنيّا

مع اني بقالي كتير باعْيَا

مش حِمل اتمشى ف عالم مزحوم عالآخِر

مابقيتش اتحمّل - بعد ما كِملت ببعادك -

...

طب فاكر يوم ما اتمشينا

ف الزحمة يوميها تعبت ازاي؟

حبيت من قلبَك “تعبانة؟”

“أنا.. أبداً.. لأ.. مش أوي يعني!

تعبانة ازاي ؟”

وف سِري “ازاي وانت معايا؟”

باتحجج كنت

وكنت باقول.. ماههونش عليك

هتهون مسافتنا الشاردة ف صَحْرا الناس

وتكش كأن ما بينّا مفيش

أستِك مشدود ورجع للعادي

صَبَحت قريّب من تاني

...

فاكِر..

- ولو انك مش فاكر -

الضحكة الكانت مفروشة

على وِشي زمان لمّا عرفتك

الحاجة الواحدة اللي بتِعلَى و باعْلَى معاها

كانت يعني!

(وانا كُنت كمان)

دلوقتي بتخرُج مجروشة

وبيفْضَل حزني عليك سجّان

...

بيقولوا الغوص تمرين للقلب على الغيبة

ما حاولت أتنفس من كام بَحر ومعرفتش

مش عارفة أتعود ع المية

الميّة بتوجع.. حساها..

لما أتلقاها ومانتاش جنبي تعلّمها تحنّ عليا

والغيم أشباح..

مليانة الأوضة كتير بالغيم - والغيم أشباح –

مانتاش ويايا عشان تِحرَقهم بانفاسَك

مبحبش لون تبخير الدنيا.. بتصبح بيضا كمان بالكدب

وانا قلبي ده حبّك -مش بالكدب-

بس انت عرفت تقول “معلش”

...

لو عارف - طبعا مش عارف -

لو عارف ان الكلمة دي وِش

مرشوش بالغِش

بتخلي القلب الكان مرتاح

بيدق بسرعة طلْق النار..

بس مابيموتش

...

فيا بَحة صوتي اتهدي خلاص

الخنقة وكسْرة نفسك شيء

والعالم شيء

كان نفسي أموت والفرحة ف بُقي ومابلعهاش.. بس أدوقها

شديتها وهي على شفايفي.. من غير ما ألْحَق!

فـ أضحك !

وكأن الحزن خلاص شطّب

وباهزر حتى ولسه الروح عمّالة تنز

وكأن الطوب في الأرض بيفهم ضِحكي أكتر منك..

فيزق أقدامي عشان محروقة وصبحت مصدر دم وهم

عمّالة تلزّق ف الماشيين

فـ أتحرك بردو ومن غير نِفس

واتشد كأني شريط بيسِف..

مش فاهم حاجة لكن شغال

...

باستنى اليوم اللي يفكّوني كلام مفهوم

ويقولوا غريبة صبَح له لزوم

وانا اقول معلش

خبوني عشان جوايا اتمزّع ع الآخر

- بقى شكلي وِحِش - !

مكسوفة من الوش المزحوم

بملامح فاضية

وقلب اتشقق كله خروم

كان فاكر يوم هيجيله البِشر

معلش يا زهر : )

معلش..

13 comments:

هدى said...

طيييييييييب يازهر

خلينا معاك نشوف هتخدنا لفين ...

انا كل مرة هنا بتسحب على قصيدة من قصايدك ..خايفة اجري على سطورها

يجرحني صدقها

او تفلت مني كلمة صغيرة ببقى عارفة انها مستخبية جوه مني

هنا ..طول الوقت ..وكل مرة

بعرف الاقيني

واتعلم اشوفني بشكل جديد

.....

تقريبا هو دا اللي اسمه شعر

....

رانيا ...

حلوة بجد ...حلتيلي مودي للمرة التانية ف نفس اليوم

تسلمي ياقمر

Anonymous said...

؟؟
أنا مش عارفة القصيدة دى زعلانة ولا فرحانة

مش راضية تقوللى!!

بيتهألى عندها أمل

بس من أول كام كلمة قالتلى قد ايه هى جميــــلة

حفظك الله

ريحانة said...

عارفة يارانيا لما أحب أدخل جوا قلبى
عشان اطلع كل اللى خنقه فى كلمة حلوة
عارفة لما بعد ما تقرى قصيدة فتحسى انك خلاص قلتى كل اللى عندك
عارفة لما حد يحسك
عارفة
بحبك

إبـراهيم ... said...

أيتها الجميلة باستمرار ... أيضًا لم يسمعوها بإلقائك ليدركوجا أي شيء فاتهم ، قد يحسن أن أقول إن شعرك مما يدخل القلب مبااااشـرة يا رانيا ، وبدون أن أفسر أو أفصل ، في تفصيلات صورك الجميلة


.
.
.
والصمت في حرم الجمال جمال

وقصيدتك بكل تفصيلاتها أكثر من رائعة

تكتبين بمداد قلب فعلاً

دمتِ مبدعة ، ومتألقة ...

سأقرأها مرة ثانية وثالثة

رانيا منصور said...

هدي

مش
عارفة
اقول
حاجة

انا مبسوطة بجد بالكلام وحاساه
ولو انه زايد عن ما عارفاني
ههههههههههههههه
مش أوي كده يعني

بس بيني بينك بردو مبسوطة
حبة ثقة بالجامد وبتاع

منوراني أز يوجوال يا قمر
فين الخطة بتاعتنا يا بنوتة؟؟

رانيا منصور said...

مها:

هي لا زعلانة ولا فرحانة
هي ف حالة "معلش يا زهر" حالة رضا

حالة
ميّة
- على رأي واحدة صاحبتي - وحشتني
ميّة

اتوحشتك جوي
...

رانيا منصور said...

ريحانة

عارفة لما حد يعلّق فيكي حاجة جوا قلبك؟
يسيبها
ويـ


فاهمة حاجة؟

بقى ليكي مكان شمال كده على فكرة
بس خلاص
....

رانيا منصور said...

ابراهيم

يخرب بيت الذوق ده يا ابراهيم بقى
أخجلتم تواضعنا وربنا
مش أوي كده طيب

أقولك حاجة
مبعرفش أعيش ف الدور أوي وبتاع

سلّم قلبك
وحسك الحلو
وكلامك الطيب

مش هاقول زرنا وبتاع بقى
مدونتك ومطرحك
...

Anonymous said...

مِتخَيّل روحي بقت فتافيت؟

لكن
معليش يازهر
معليش ..


حبيت كلامك هنا جداً والله

sara rabie said...

رانيا...لما تتسمع منك حاجة تانيه خالص
والاجمل بقى لما ارجع اقرأها تانى وصوتك لسه فى ودنى
وحركات ايدك انا شايفها

رانيا..يااجمل زهرةزرقة

بحبك جدا

ربنا يحميكى

sara rabie said...

رانيا...لما تتسمع منك حاجة تانيه خالص
والاجمل بقى لما ارجع اقرأها تانى وصوتك لسه فى ودنى
وحركات ايدك انا شايفها

رانيا..يااجمل زهرةزرقة

بحبك جدا

ربنا يحميكى

رانيا منصور said...

نهران..

وحبينا مرورك هنا جدا جدا
ومستنيينه تاني

سليم كده؟
نورتي الدار
..

رانيا منصور said...

سارة،

يسم قلبك يا صاحبتي
يا بنت انتي والله بحبك عن جد

بتغيبي ليه؟؟
..