محدش له دعوة.. باحكي مع ربنا

طب

أنا يارب تعبانة أوي

وزوري واجعني أوي

وجع واصل لروحي يارب

ويارب ليه كله بيوجع كده؟

أنا تعبانة يارب بقى

باشتكيلك حالي

مش عايزة حاجة تتغير ما دمت راضي

أنا بس باحكي معاك

ماهو محدش فاضل يارب

ومحدش فاضي يارب

بس انت عايزني ف وسطهم

فـ حاضر يارب

راضية والله

بس باحكي

باحكي يارب

..

آه

مش عارفة أبلع ريقي

ومش عارفة أتنفس كمان

أصلهم سادّين قلبي

وأنا خايفة يارب

خايفة منهم

ومني أوي كمان
ومش طالبة حاجة يارب

كفاية سايبلي نعمة الحكي ليك

باحكي يارب باحكي

مش خايفة أقول أدامك يارب اني خايفة

باخاف أدامهم أقول أوي

أصل الخوف أدامهم بيضعف أكتر

أدامك عارفة اني هاقوى

بخاف منهم

وبخاف مني عشان ساعات بالاقيني اتنين تلاتة غيري

مابيصدقو اتهز شوية

بيشدوني على أقرب حفرة

انا خايفة يارب

..

هي ليه أفلام الرعب بتوجعني؟

مش بتخوفني

بتوجعني أوي

بتوجعني بجد يارب

بقيت عاملة زي سجادة موكيت

اتمشى عليها كتير

اتبرتْ يا رب

اتبرت

..

انا مش احسن من حد يارب

آه

بس انا تعبانة بجد

بجد

مخنوقة يارب من الزحمة

ومن الكدب

مع اني ساعات باكدب

ومن الحب

ومن البطانيات التقيلة أوي وانا واخدة دور جامد بيموتني

امبارح ما قلتش اني سخنة

وماقلتش اني وحيدة

واني حزينة

بس صوتي اللي بيعلى لوحده قال

ومحدش

حس

مش زي ما فاكرين والله

حواليا كتير؟

.. طيب

..

والسفر حلو أوي

حلو الهوا اللي بيدخل بالعند ف الشبابيك المقفلة

بس وانا راجعة بقى الجو موحش

وأسود

بيدخل مع الهوا طعم الضغط الواطي

وكنت عايزة انام

افتكرت ان لسه أدامي ساعتين ونص على سريري

اللي هانام عليه

ومش هاقول اني عيانة أوي

ولا ان عينيا بتطلع نار

ولا قلبي بقى 3-4 حتت

وانا جاية ف السكة يمكن وقعوا مني

..

انا مش فاهمة يارب

فهمني

انا ليه مش شايفة الصبح بتاعي؟

مع اني عارفة موجودة ليه ف الدنيا
فهمني يارب

فهمني عشان روحي عِيِتْ

..

وأنا خايفة تاني كمان
ومش عارفة

هو أنا أنانية أوي؟

وحشة أوي يعني ؟

بعيدة عنك أوي يارب؟

طب ازاي وانت يارب سايبني أقول اللي ف نفسي براحتي

آه

انا باغلط واذنب ياما

بس عارفة انك بتحبني

وبحبك يارب أوي

بحبك بعيد عن قناة الناس والتوبة والرحمة

وبعيد عن مربعات الإحساس بالذنب

..

احميني يارب

مش عارفة أحميني أنا
وقلبي مكسور بالجامد

وعايزة يسيبوني معاك بس يارب

ينفع؟
:)

HaPpY BiRtHdaaaY

ماكنتش ناوية بس يلا بقى
!!
...
لنفرِض انه عيد ميلادِك فعلاً
وانك ف وِسط أهل ربك أنعم عليكي بيهم
حاسّيـــــــ ـنِك أوي
وأصحاب بيـ حبوكِ
بجد حابِّينِك أوي

صحيح عندك فقد واحد
بس عندك "رب كريم" أوي

يبقى إيه؟؟
كل سنة وانتي بردو طيبة
ياما هتدق عالراس طبول

Happy Birthday ranOna :)
..

معلش يا زَهر

عارف..

ولو انك مش عارف

في طوبة ف روحي بتتفتفت

مِتخَيّل روحي بقت فتافيت؟

مردومة الدنيا عليا عياط

بتنقّط جوا ضلوعي صريخ

فـ باوَطِّي الصوت

بامسك منْديل وَرَقُه مرطّب

وأدعك قلبيـ بِْحكَايات النور وأفضَل اطبطب

“إهدَى.. إهدَى”

وأدعك قلبك.. لساه مغيّم

هينوّر تاني أكيد لازم!

...

وأمسك ورقِةْ سلوفان بِتْوِش

تِتْلفّ ف إيدي وتصبح دايرةْ نور بتضُم

واتمنى انا وانت نكون جواها ف نُص القُطر

نخلّي معانا ديوان نقراه.. وشوية مَيَّة

علشان لو عِطشت جَنّتنا..

نسقيها.. نسقسق نواحيها

بتحب المشي؟ راح الفّ الدنيا على عنيّا

مع اني بقالي كتير باعْيَا

مش حِمل اتمشى ف عالم مزحوم عالآخِر

مابقيتش اتحمّل - بعد ما كِملت ببعادك -

...

طب فاكر يوم ما اتمشينا

ف الزحمة يوميها تعبت ازاي؟

حبيت من قلبَك “تعبانة؟”

“أنا.. أبداً.. لأ.. مش أوي يعني!

تعبانة ازاي ؟”

وف سِري “ازاي وانت معايا؟”

باتحجج كنت

وكنت باقول.. ماههونش عليك

هتهون مسافتنا الشاردة ف صَحْرا الناس

وتكش كأن ما بينّا مفيش

أستِك مشدود ورجع للعادي

صَبَحت قريّب من تاني

...

فاكِر..

- ولو انك مش فاكر -

الضحكة الكانت مفروشة

على وِشي زمان لمّا عرفتك

الحاجة الواحدة اللي بتِعلَى و باعْلَى معاها

كانت يعني!

(وانا كُنت كمان)

دلوقتي بتخرُج مجروشة

وبيفْضَل حزني عليك سجّان

...

بيقولوا الغوص تمرين للقلب على الغيبة

ما حاولت أتنفس من كام بَحر ومعرفتش

مش عارفة أتعود ع المية

الميّة بتوجع.. حساها..

لما أتلقاها ومانتاش جنبي تعلّمها تحنّ عليا

والغيم أشباح..

مليانة الأوضة كتير بالغيم - والغيم أشباح –

مانتاش ويايا عشان تِحرَقهم بانفاسَك

مبحبش لون تبخير الدنيا.. بتصبح بيضا كمان بالكدب

وانا قلبي ده حبّك -مش بالكدب-

بس انت عرفت تقول “معلش”

...

لو عارف - طبعا مش عارف -

لو عارف ان الكلمة دي وِش

مرشوش بالغِش

بتخلي القلب الكان مرتاح

بيدق بسرعة طلْق النار..

بس مابيموتش

...

فيا بَحة صوتي اتهدي خلاص

الخنقة وكسْرة نفسك شيء

والعالم شيء

كان نفسي أموت والفرحة ف بُقي ومابلعهاش.. بس أدوقها

شديتها وهي على شفايفي.. من غير ما ألْحَق!

فـ أضحك !

وكأن الحزن خلاص شطّب

وباهزر حتى ولسه الروح عمّالة تنز

وكأن الطوب في الأرض بيفهم ضِحكي أكتر منك..

فيزق أقدامي عشان محروقة وصبحت مصدر دم وهم

عمّالة تلزّق ف الماشيين

فـ أتحرك بردو ومن غير نِفس

واتشد كأني شريط بيسِف..

مش فاهم حاجة لكن شغال

...

باستنى اليوم اللي يفكّوني كلام مفهوم

ويقولوا غريبة صبَح له لزوم

وانا اقول معلش

خبوني عشان جوايا اتمزّع ع الآخر

- بقى شكلي وِحِش - !

مكسوفة من الوش المزحوم

بملامح فاضية

وقلب اتشقق كله خروم

كان فاكر يوم هيجيله البِشر

معلش يا زهر : )

معلش..