Saturday, September 19, 2009

أوّل عيـــ ـــد


أول مرة ماما ماتوجهنيش
ولا تقوللي ابتدي منين ف الشقة بالضبط
دوري ايه انهاردة
المطبخ ولا الصالة ولا النوم ......

أول مرة ماتوقعش تقوللي اني سِبت حاجة ماعملتهاش انا ودنيا
أو نسينا - كالعادة قصدًا- فوق التلاجات اللي مرصوص فوقهم ميت حاجة ولازم يتروق كويس
ويتشال المفارش بتاعتهم وتتغسل
ويتنشّروا
عشان يترص فوقهم تاني الفوانيس والفازات اللي مالهاش مكان
غير فوق التلاجتين !

أول مرة أقرر أفرش ايه للسرير
واظبّط وقتي كويس
عشان ورايا سجاجيد
وشقة
وأكل يتعمل

أول مرة لوحدي افتكر اني عايزة اجيب بالونات
عشان البيت ينور

أول مرة !

وأول مرة أحس اني مسؤولة أوي
خايفة اوي
ومنطلقة اوي
وف نفس الوقت
مش خايفة خالص

خايفة عشان باخد قراراتي لوحدي
ومش خايفة عشان قراراتي ماحدش هيعلق عليها
قراراتي ليا وعليا حلوة او وحشة
فخايفة منها
ومش خايفة من حد
غيري
..

ع الجانب الاخر
انا معايا أغلى ما اتمنيت الاقي ف حياتي
طول عمري
أول عيد قلبي حاسس بسكينة وهدوء
مش خايفة
مش مستنية حد
مش محتاجة لحد -تاني-
مش بادوّر
مرتاحة البال معاه

..

أول عيد يبتدي وانا محتارة
حاسة اني ف عنق زجاجة حقيقي
انا كويسة ولا لأ؟
اشتغل ولا استنى؟
محتاجة أعيد تفكيري ف ميت حاجة ف نفسي
مهاراتي
مبادئي أحيانا
اسلوبي مع الناس
احتياجاتي
أسلوب كلامي وحياتي وعلاقاتي
أول مرة ألمس حتت معينة بتنور ف قلبي
وحتت تانية اللُمَض بتاعتها ضربت
محتاجة بشكل فوري تتغير

..


رمضان "كان" حلو
عشان صبامه كان متعة
فاكرة اوي ان كل يوم ابقى هاموت من العطش بالنهار
وتقريبا باجوع
لكن قرب المغرب الحال بيبقى غيره
واقول ف سري لو يتمد المغرب شوية
لسه بدري يا صيام
في متعة بجد ف قرصة الجوع وعضة العطش

لكن كنت خايبة ف حاجات تانية
عباداتي مثلا
يا ترى الاحساس لو عالي اوي يغني عن عبادات؟؟
مش عارفة !

..


عايزة افكر ف حاجات كتير اوي
عايزة اكتب ف حاجات اكتر
عايزة ارتاح اكتر من ده كله
بس مش عارفة ابتدي منين

..

بكرة هاجيب الكحك :)
ان شاء الله
..

عيد "جديد" جدا

10 comments:

عالمى ازرق said...

كل سنه وانتى طيبة
وجميله كعادتك دايما

nudy said...

الاحساس بالمسؤلية عن حاجة اي كانت بيبقي احساس جميل جدا ولكن الامهات مش بيدونا اي فرصة ولازم يعدلوا طول الوفت وده بيخلي الواحد يشتغل وهو اخر زهق

البوست يمس القلب فعلا وتقريبا كل الامهات بتعمل كده

كل سنه وانت في سعادة

قهوة بالفانيليا - شيماء علي said...

كل سنة و انتي طيبة ..
انتي لسة ماجبتيش الكحك ؟؟ :)
اكيد زمانك جبتيه دلوقتي طبعا :)
عيدك مبارك

reham said...

كنت لسة كاتبة ان عيدي انا كمان مختلف السنة دى .. اكتشفت انى مش لوحدى بقى :))

كل سنة و انتى بالف خير و راحة بال

و اشتغلي ماتستنيش ;)

كرانيش said...

ياه يارانيا كل احاسيسك حلوه
ربنا يباركلك فيها
وتعرفى دايما تلقى حتت النور اللى جواكى

رانيا منصور said...

زرقاء

وانتي طيبة وفرحانة دايما يارب :)

رانيا منصور said...

نودي

وانتي بألف فرح وأمل وجمال قلب :))

رانيا منصور said...

شيماااااااااااااء

جبته تاني يوم يا توتة :)
كل سنة وانتي بهنا وعيد

..

رانيا منصور said...

ريهام !


اشتغلت شغل والله !

حتى الجدع ماترحمش :))
كل سنة وانتي طيبة

..

رانيا منصور said...

كرانيش

وحشاني اوي
بيوصلك السلام؟؟

يارب الاقيها يا كرانشة :)
كل سنة وانتي أمورة

..