وانتي كمان ....

مبدأيًا

في لسعة برد..

بتحطّ ف قلبي

تخيِّم

لما أتنشّق على حاجة

ومعرفش أطلبها
..



آخر مرة خرجنا

العالَم كان زحمة بسدِّة نِفس

واقفين فـ اشارة

- مع ان العادي وقوفنا ولو من غيرها -

عَدَّى بتاع فل

واتمنيت لو تاخد بالك من سخونية إيدي

وصوتها العالي

- على غير العادة -

ضغطي ماكانش بيوطّى ساعتها!

كان نفسي تراجع نفسك بس

ماتخافش لا حدّ يقول اتنين حبِّيبة

أو حد يبص عليا وياخد من وِشي شوية

لو جبت لي فرْط الفل

وبَدَرته عليّا

أو عقدين

يا سلام!

واحد لرقبتي الباصّة عليك

والتاني لإيدي الساكنة ما بيني وبينك
..




أخويا النادر أن يتواجد

بعد كلام محفور ف الروح عمره ما يتقال

لو واخد بالك

كام شهر بيجروا ومش باسأل

لو تعرف إن كلامي ساعات عنك بيدشّ حاجات فـ البيت

واني ساعات باشتقالك جدا

باحلم بكلامنا على الّتشات

- ما مفيش في الواقع بينا كلام -

واني باكلم عنك روحي

فيقول معلش..

مشغول يمكن بحاجات له أهم

إتمنِّي عشانه الخير وسيبيه

طب مانا سايباك !

فـ اسكت

مانطقش

..



محتاجة أنسق عمري وارتِّب فيه

حبَّة عشانه

كتار

علشان غلبان..

بيحبّ كتير ياخد من قلبي زفيره يعيشه

وشوية عُمر عشان أصحابي اللي ماعُدتِش فاهماهم فين

وأهلي

مع اني كتير باتكهرب لما باقرب منهم

وان فِضلت حاجة

هاقسمها ع الفقرا اللي ماحيلتهمش حياة

ماهي كده او كده مش كافياني

دايما ..

حاسة ان انا باجري

"استنَى شوية عشان محتاجة اتحاكى معاك"

بس مفيش وقت !

إنهاكي مالوش ألوان أو وصف معيّن

باهت

بس ماليني بأرواح.

إزيَك؟

وواحشني!

وانتي كمان..

نتغدى بسرعة

ونلحق بدري ننام

علشان الفجر خلاص بقى يسبق صوت الليل

فمفيش داعي لتضييع الضايع أصلا من وقت

الساقية بتفتح بدري

ولازم نلحق نمسك فيها

لا تطوّح حبة عيش مبلول بنلعّب بيهم جوفنا

عشان ما يموتش

وعشان ماتبوشش اسناننا

ولا تِتْلم من كسْرة نفس الواحد

ولا تسقط جوا

يمكن نحتاجها فـ يوم

مع ان اليوم اللي بنستنى نعيشه بعيد

أو يمكن أصلا جفّ خلاص ومعادش وجود

الواضح جدا بس

اننا عايشين علشان نلحق نتغدى بسرعة

ثم ننام !

والوقت الباقي يادوبك بس

واحشني

وانتي كمان

..