Saturday, October 30, 2010

هو انت حاسِس بـ جناحاتك؟؟


في حاجة ف القلب اللي واخد ع المطبّات والهزايم/ طالعة فوق/ زي اما تبقى غرقت تحت

ولسه بتفكّر تقب/ متعلّقة فـ نقطة مطر بِردت خلاص/ في حاجة ناسية انك على أدك تماما/


وانك بتتعب م المشاوير البعيدة/ ركوب مواصلات حتة تانية/ غير قريّب م الجيران/ في


حاجة بتقول انت جامد/ وانت بترد بتحفّز/ وانت مش واخد فـ بالك ان ممكن تبقى فعلًا حد


جامد/ متعود انك حد خايف/ حد تعبان بالأوي/ حد دايمًا مستِوي/ أو حد لافف فوق كتافه شال


تقيل/ أحسن ما ياخد فيها برد/




بس لسه/ حاجة فـ القلب اللي هادي ومستكين/ قال يعني هادي ومستكين! عمالة تِخبَط فـ


جناحاتك/


(هو انت حاسس بجناحاتك؟)


فتقوللها متعطّلة/ فترد/ قوم شغّلها يلا الدُور بدأ/ فتقوللها عارف مانا دايما كده.. دايما من


المتأخرين!/ مستنيينك عند ناصية قريبة/ بطل كلام!/ شغّلها بس بسرعة يلا عشان نفوت/


الدنيا ما بتستنّى حد/ لكن أنا واخد على التكسير وبس/ أسهلـ لي انام.. واخد عليه لما اتهزم/


معلش طاوعيني وسيبيني انام واقوم واخد زيادة على السماح/ في حاجة بتخربش وصوتها


مَتنِي تحتي/ جوايا بيقولك بلاش!/ ماتطاوعينيش/ وتسيبي نقطة حرة فيا تموت كمان/ خليني


اقوم/ لكن ده صعب/ ماتطاوعينيش/ فسيبيني نايم/ لأ خديني/



ازاي هاقوم/ ازاي هاقضي العمر متهمّد كده/ خايف لا اقع/ لكن مانا واقع هنا بالشكل ده/


أحسن ما اقوم واسقط بعيد/ مين قاللي أحسن!/ باخترع / !ماتقوموني/ !سيبوني أهدا لوحدي


واسكت/ مش كفاية بهدلة؟/ البهدلة ف الرَكنة جنب كتير سقط/ وانا عايز اقوم/ لو قمت طولي


هيتفرد واصبح عامود شايل سماه/ وابقى النخيل واقف على نفسه/ بنفسه مكتِفي/ انا لو هاقوم


هاصبح كلام يحيِي الجبال ويقول من السِحر المَقال/ ويشد حيل الناس معاه/ ويصبّر المحزون


معاه/ ويعارض الخوف والكسل والمهزومين/ والمحتارين/ والمدعوكين فـ النوم زهق من


أصلها كل الحياة/


وده لو هاقوم




في حاجة جوا القلب لسه بتتعدل قعدتها فيه


بتقول اقوم

/

بس البداية لسه عايزة تبتدي


6 comments:

Mohamed Osama said...

في حاجة جوا القلب لسه بتتعدل قعدتها فيه
بتقول اقوم
بس البداية لسه عايزة تبتدي

الله .. الحقيقة سعيد جداً
بالمدونة وسعيد أكتر بالأسلوب الفريد ده

أشكرك ومتابع دائم ان شاء الله

رانيا منصور said...

أنا الأسعد يا محمد :)

أتمنى تتابع وتقول رأيك دايمًا ..

Hu-man said...

العنوان شدني قوي
والكلام شدني أكتر
الكلا طبيعي جدا وطالع من القلب
..
مع انه كلام ممكن افكره عادي وبسيط بس بيوصل

الشموع السوداء said...

بجد البلوج كله رااااائع
سعيدة بالتعرف اليه
:))

رانيا منصور said...

Hu-man
سعيدة بمشاركتك وكلامك الودود

أتمنى تزورني دايمًا

شكرًا ليك :)

رانيا منصور said...

الشموع السوداء

أنا أسعد يا جميلة
مستنية رأيك دايمًا :))