Wednesday, December 28, 2011

حالة حُب





بعيد بقالها ربع ساعة

قمت ابصـ لها من البلكونة واقولها باي زي العيال

واستناها تبص لفوق وتشوفني وترد بابتسامة،

و"ماما" مش واصلة لوداني..

حبال الغسيل المنشور وجهاز التكييف بيشوشر علينا

بس بالفّ وأشبّ عشان اشوفها مِ الناحية التانية

وتغيب وهي متشالة ع الكتف،

وتبعد والشارع يضيق

فقلبي يتخطف،

وادخل من البلكونة مكسورة شوية وإيدي ع قلبي

مش عايزة انزل خلاص

هالغي النزول واروحلها ع هناك..

هي فـ يوم هتسيبني ؟!

وشها حلو.. زي الطماطماية الطازة

ودمها خفيف زي الأرنب

وصغننة زي فنجان القهوة اللي يحنِّس، ما يشبّعش

لما قصيت شعرها حسيتها صِغرت تاني

هو انا ليه بقيت أحس ان عندها 28 سنة

وعندي 55 سنة؟

أوقات باحس انها وحشاني لدرجة أعوز أبلعها عشان تبقى أقرب من الحضن

واحتاج ترجع بطني تاني عشان مكانش ينفع بينا "مُذيب غِرا"

أول مرة أحس ده ..

معتقدش آخر مرة

4 comments:

عالمى ازرق said...

ربنا يخليهالك ويباركلك فيها
وميحرمكيش منها

رانيا منصور said...

:)))

لا هو في ناس لسه بتيجي هنا؟
لم أتوكّع !

منورة يا جارتي :)

Rosa said...

الله وجعتى قلبى اوى
يسلم احساسك
وربنا يخلى :)

رانيا منصور said...

شكرا يا روزا

ويسلم وجودك وكلامك :)

البوست الجاي فيه ندوة قريبة،
تعالي اسمعي شِعر

مودتي،،