Sunday, November 25, 2007

محدش له دعوة.. باحكي مع ربنا



طب

أنا يارب تعبانة أوي

وزوري واجعني أوي

وجع واصل لروحي يارب

ويارب ليه كله بيوجع كده؟

أنا تعبانة يارب بقى

باشتكيلك حالي

مش عايزة حاجة تتغير ما دمت راضي

أنا بس باحكي معاك

ماهو محدش فاضل يارب

ومحدش فاضي يارب

بس انت عايزني ف وسطهم

فـ حاضر يارب

راضية والله

بس باحكي

باحكي يارب

..

آه

مش عارفة أبلع ريقي

ومش عارفة أتنفس كمان

أصلهم سادّين قلبي

وأنا خايفة يارب

خايفة منهم

ومني أوي كمان
ومش طالبة حاجة يارب

كفاية سايبلي نعمة الحكي ليك

باحكي يارب باحكي

مش خايفة أقول أدامك يارب اني خايفة

باخاف أدامهم أقول أوي

أصل الخوف أدامهم بيضعف أكتر

أدامك عارفة اني هاقوى

بخاف منهم

وبخاف مني عشان ساعات بالاقيني اتنين تلاتة غيري

مابيصدقو اتهز شوية

بيشدوني على أقرب حفرة

انا خايفة يارب

..

هي ليه أفلام الرعب بتوجعني؟

مش بتخوفني

بتوجعني أوي

بتوجعني بجد يارب

بقيت عاملة زي سجادة موكيت

اتمشى عليها كتير

اتبرتْ يا رب

اتبرت

..

انا مش احسن من حد يارب

آه

بس انا تعبانة بجد

بجد

مخنوقة يارب من الزحمة

ومن الكدب

مع اني ساعات باكدب

ومن الحب

ومن البطانيات التقيلة أوي وانا واخدة دور جامد بيموتني

امبارح ما قلتش اني سخنة

وماقلتش اني وحيدة

واني حزينة

بس صوتي اللي بيعلى لوحده قال

ومحدش

حس

مش زي ما فاكرين والله

حواليا كتير؟

.. طيب

..

والسفر حلو أوي

حلو الهوا اللي بيدخل بالعند ف الشبابيك المقفلة

بس وانا راجعة بقى الجو موحش

وأسود

بيدخل مع الهوا طعم الضغط الواطي

وكنت عايزة انام

افتكرت ان لسه أدامي ساعتين ونص على سريري

اللي هانام عليه

ومش هاقول اني عيانة أوي

ولا ان عينيا بتطلع نار

ولا قلبي بقى 3-4 حتت

وانا جاية ف السكة يمكن وقعوا مني

..

انا مش فاهمة يارب

فهمني

انا ليه مش شايفة الصبح بتاعي؟

مع اني عارفة موجودة ليه ف الدنيا
فهمني يارب

فهمني عشان روحي عِيِتْ

..

وأنا خايفة تاني كمان
ومش عارفة

هو أنا أنانية أوي؟

وحشة أوي يعني ؟

بعيدة عنك أوي يارب؟

طب ازاي وانت يارب سايبني أقول اللي ف نفسي براحتي

آه

انا باغلط واذنب ياما

بس عارفة انك بتحبني

وبحبك يارب أوي

بحبك بعيد عن قناة الناس والتوبة والرحمة

وبعيد عن مربعات الإحساس بالذنب


..

احميني يارب

مش عارفة أحميني أنا
وقلبي مكسور بالجامد

وعايزة يسيبوني معاك بس يارب

ينفع؟
:)

26 comments:

نهى جمال said...

وربنا هيسمع

ياصابحتي بحبك

بجد
:)

عنتر بن غلبان said...

قال الشافعي

تعاظمني ذنبي فلما قرنته
بعفوك كان عفوك اعظما


معرفش ينفع القياس هنا ولا ايه بس نقول


تعاظمني بعدي فلما قرنته
بعطفك كنت مني اقربا

ربنا يزيدك قرب


بوركت

Anonymous said...

طبعا انا ماليش دعوة بما إنى ماحدش!

مع ان الكلام ده بيعدى من فوقي و لا يرانى

ربما لأنه ينظر إلى ما هو أعلى

سلامتك من السخونية و البرد
و الرشح!

Anonymous said...

يااااااه يا رانيا هيه الروعة ديه يابنتي دا انا عنيا دمعت و انا بقرأ
ربنا يحميكي ويسعدك

كرانيش said...

حلو قوى ده

ماحدش يقدر يبقى له دعوه فى اللى انتى بتقوليه
عارفه ليه؟

عشان دى اخص الخصوصيات

كم انتى رائعه يا انتى

Anonymous said...

لا بأس .

م.ش

عين ضيقة said...

بحبك



بحبك


بحبك والله


انا هسيبك مع ربنا بقى علشان ترتاحى

يحميكى ان شاء الله

كريم بهي said...

كان نفسى اعلق
بس انتى دلوقت مع ربنا
لما ترجعى
ياريت تقوليلى
عشان ابقى اقولك تعليقى

كل الحب والاحترام

كريم بهي

رانيا منصور said...

نهى:
آه
أكيد ربك هيسمع
صح؟
آه صح
وانا بجد بجد
...

رانيا منصور said...

عنتر بيك:

ينفع القياس
ربنا يزيدنا جميعا قرب

وبوركت بالمثل
...

رانيا منصور said...

مها :

الله يسلم قلبك يا حبيبة
ربي يسعدك
ويحفظ روحك
...

رانيا منصور said...

بعض مني:

هي روعة مناجاته
ما أقربه حينها
وما أجمل لحظة يكرمنا بصفو الحكي معه

وحفظك الله دوما
مودة
...

رانيا منصور said...

كرانيش:

ماكنتش قاصدة ادعي أوي يعني
كنت حابة
ومستمتعة بحالة الحكي
الفضفضة
للي خالقني
وبس

بس كده
مودتي يا جميلة

رانيا منصور said...

م.ش.

فعلا لا بأس

مودة يا افندم
ولو اني مش فاهمة حاجة

رانيا منصور said...

أسما :

وانا كمان بحبك والله
آه يا سمسمة
بدعيه
وياريتك تدعيه ليا كمان معاكي
يحفظني عشان
جوايا مكسّر ع الاخر

يسعد قلبك يارب
...

رانيا منصور said...

كريم بهي:

لو الواحد يقدر يفضل معاه علطول ...
بس بنروح ونيجي
وبيفضل سايب لنا الباب مفتوح

ما علينا
أنا جيت اهو
إيدك عالتعليق :)

مودة

fawest said...

بجد دعوتك
و دعائك
حسيت أنك بتكلمى ربنا بجد
مش بتستعرضى قدامنا

كريم بهي said...

حمدالله على السلامة
وبجد كلماتك هزتنى اوى
وخاصة بعض الجمل زى

ومش طالبة حاجة يارب كفاية سايبلي نعمة الحكي ليك باحكي ياربارب

يشويةبيشدوني على أقرب حفرةانا خايفة

وغيرها عشان ماطولش
انا اللى شدتنى كتابة العنوان الطفولى البرئ
ميرسى اوى على كلماتك ويارت تنتهى احزانك
واسمحى لى اضيفك عندى
تحت لينك
اسبح دائما تحت شلالهم

كريم بهي
بكل الحب

هدى said...

سلامتك

يا حبيبة


وسلامة روحك

البريئة

...

وليد خطاب said...

ربنا يكرمك يا رانيا
احساس جميل بيحرك حاجات اجمل جوانا
تعرفي .. لو مكنش غير رغبتنا ف وجود ربنا فده كافي جدا انه يبقى موجود
سلامتك يا طيبة

رانيا منصور said...

فاوست:

والله يافندم كنت باكلم ربنا بجد
بس ساعات تحب تثبت أدام نفسك انك
بتقول الكلام وحتى مش هامك حد يعرف انت ايه
وحش اد ايه
خايف
ضعيف
اد ايه

منورنا

رانيا منصور said...

كريم بهي:

سعيدة بجد بزيارتك تاني
وسعيدة بإضافتك كمان ياافندم

شكرا عالمرور طيب
والكلام الرقيق

مودتي

رانيا منصور said...

هدى:

دايماً باحس زيارتك بجد
يعني كأن حد زارك فيالبيت وانتي تعبانة
واصلك؟

مودتي بجد يا حبيبة

رانيا منصور said...

وليد:

حلو الدعا ده أوي بحبه
ربنا يكرمك
يا رب يكرمني ويكرمك والجميع

عارف
لما بنحكي مع ربنا
باحس ربنا أقرب لنا بكتييييير
وبيحن علينا
مع اني بعيد أوي

يارب قربني يا رب
عالم اني باشهد الكل اني نفسي
فمدّ لي يد الكرم

ماعلينا يا وليد
منورني أز يوجوال بجد يا صديقي

حمامة said...

جميلة
بريئة
صادقة
:)

رانيا منصور said...

غراب & حمامة:


جايز :)



مودة،،