Thursday, December 18, 2008

جونيور

مش باكتب نص

مبخترعش جديد

كل الفكرة اني باشفّ

بانقل حاجات وبس!

يمكن بس بتبقى عاملة زي صاج الكحك

باساوي اطرافه واساويه

بس!

عندي قدرة على بروزة الوجع

وساعات الحُب

والقلق

غالباً بتبقى السلبيات في ايدي منديّة

باعرف أخليها تعيط قبل ماتطلع منتج يستفز مخزون العياط عند غيري

..

لما باحلم

باستغربني!

:)

مش أوت أوف كآبة!

بس يمكن صناعة الحزن أسهل؟

أو العائد أوقع!

يمكن مرض نفسي ؟

أو متعة تعذيب الغير معايا؟

ويمكن أصلاً بس الاحلام ماعادتش تجيب همّها

..

متهيألي

أظن..

في زمن ما كنت باحلم زي باقي خلق الله

زي خلق الله = البنات :D

بس بردو كانت أحلام مضروبة على وشها فمش واخدة راحتها أوي في الطققان

لا عايزة فارس

ولا ميل جيبسون/ أيام الشباب والعِز

عمري ما شفتني ولو في حلم أبيض وأسود

أم كبيرة في السن

أو زوجة بعد كام سنة كتير!

أقصى ما كنت باعرف أحفر بصوابعي وأوصلله

كان بيبقى مرحلة حب/ جواز جديد/ أول يوم شغل/ نجاح/ ماستر/…

عمري ما عرفت اشوفني بعد مرحلة البداية!

مابعرفش أدخل جوا!

حتى لما غصبت على نفسي ف يوم وقلت يبقالي حلم زي اصحابي!

كل يوم بيحكو عن حاجات نفسهم فيها

أو شافوا شبهها!

الله!

في متعة في مجرد الحكي عن دماغهم واللي فيها

في طعم طاير لحاجة حلوة فضلت على لسانهم!

طيب أجرب!

مسكت الإبرة والقماش وهاتك يا تأليف :)

واللي طلعت بيه؟

وماحدش يطالبني بأكتر منه عشان أنهكت خلاص وانا يا حبة قلبي بنيّة فـ سنة كام؟؟!

طيب..

حلمت انهاردة يا دينااا “وعينيا بتلمع”

ولد أسمر

وحكيت عنه :)

فاكرة اني قلت مش مهم ملامحه

المهم ايديه تكون واسعة!

وتاني وقت فـ زنقة التريقة التمام!

يا بنتي أحلامك معووجة!

طب كملي..

يعني يكون …. و …… و …..

صياد

أو مراكبي

أو بياع ياسمين وورد

واقعي يا احلام!

هو انا امتى عرفت احلم؟

مممممم

عشان كل كلمة كانت بتتضرب علة قفاها:

-يا نهار! وباباكي هيوافق!

:(

-طيب كملي..

عايزاه متدين

-ييييييييييييييييه..

وتقعدي في البيت؟ ويقولك مفيش ميكاب؟ ومفيش تليفزيون؟

:(

دماغين بيتكلموا

او دماغ وبَرَاح

انا كنت باتكلم بعينين باصين لمكان جيت منه وتهت

ماعرفتش أكمل!

عشان الحلم الأهبل في عينيهم ماينفعش يتحكي!

ده

زمان!

دلوقتي: !!

- رنون، أخبارك؟؟ “بنظرة أو عوجة وِش تقول معناة السؤال”

- :) طيب

وبيحبني

- عنده …….............؟؟

- مش عايزة غير بيت صغير “وفـ سري عجلة”

- بتحبيه أكيد! مجنونة!!

- (فـ سِرّي) مش عايزة أكتر من انه يشوفني بجد

لو شافني هيحب الهوا اللي حواليا :)

- يا ماما بطلي بقى! انتي مابتتعلميش!

:( “أقول ازاي ع الوردة الزرقا؟”

ع الأحلام اللي ضاق عليها الكلام

وكبرت

أصلا أنا اكتسبت مناعة ضد الكلام عنها!

طب ياللي فوق

عايزاه طيب// مش غلبان

عايزاه أكرم خلق الله

علشان مايحرّمش عليا الفرح

عايزاه بيحب..

طب ع الاقل يكون بيحب الزرع

“ورقة شجر نشفت اه.. بس يمكن لما تشوفه تبل ايديها بريقها وتصحى”

عايزاه ملخوم بيا

مش سيبتونا نشوف أفلام؟؟

أحماااااااد.. منىىىىى!

الله!

حبيبي دائماً

كله عك!؟

دلوقتي “كلهم وحشين؟” !

طب إيه!

مش ماتت على ايديه؟

ايه المانع يسأل كل شوية

ويقلق

ويجيلي الشغل فـ ايده بوكيه ورد كبييييير

او اجي انا الصبح الاقي مفاجأة !

ايه المانع يقوللي بحبك اوي في وسط الشارع

ويغنيلي

ويعيط عشاني

ايه المانع يضحّكني

وييحكيلي حدوتة “بجد” قبل ما انام

يخليني نور

ويشبّ عشان آجي عليه فيشوف أدامه

ليه مايتعبش عشان يقوللي قريب سوا؟

يعني يبقى كفه واسعة تشيل الحمل :)

وممكن أشرب منها
تأويل الحلم!

اه صح ده حلم!

ليه ينام؟

عايزاه صاحي علطول

مابيزعلش

ومابيزهقش

ومابيتعبش

قمة اللا انسانية مني ها؟

ههههههههه

بس مانا مش انسانة قلنا

وبلاش تريقة!

مش من هنا قلنا

من هناك!

فوووووق!

حيث فوق مش بني آدمين

بس هما يلاقوني!

عايزاه معجون بحنان

بس قوي!

يخرج يصطاد تمساح

فيكون صياد

يرجع يحضن صوتي التعبان ويقعّدني على السوفا

“في الكوخ”

ويحط ايديا على دماغه

ويطبطب أوي

يدخل عالكوخ صرصار “المشهد هنا كان كهف وليه معرفش”

فاصرخ

“مش هايفة.. بس ساعات باحتاج أدامه اخاف فيطمني”

يطلع من كفه كمان إعصار يقحت ف الخوف

يبدأ يحكيلي حكاية جديدة عن الوحشين

وعن الأمورة الهادية ونومها وخوفها ورقتها

فاتجنن!

واقوله عايزة افرقع صواريخ

فنأجر طيارة ورق مشدودة كويس

ونفرقع بمب وصواريخ

ونغني

ناكل

نزهق فنلم شوية فـ حبات رمل

وحجر وطوب شكله غريب

نخرج نشتري بويا “ألوان”

ونقرر ندهن كل البيت بالأبيض

ابيض خالص

آه

ونجيب عصافير

ممممممم

او نوع طير تاني يعيش من غير اقفاص يعني

وقطة

لازم يكون سوبر مان :)

جدع من بتوع هنا مش هناك

وقت الجد يتخانق

ويزعق للكل

مايسيبنيش احتاج اطلب منه مساعدة اساساً

زي الجنة!

مجرد ما افكر الاقيه بيعمل حاجة عشاني

أنانية بشدة!

مش هاتكلم ممكن اعمل عشانه ايه

مش هافكر

يمكن ماعملش!

بس هو يكون أجمل مني

وأحن

..

سبحان الله!

بردو الحلم مفيهوش لا مشاكل ولا عيال ولا غياب ولا غباء!

عمري قصيّر يمكن

أو حلمي جبان؟
وقفة:

انا لا رومانسية ولا مكتئبة ولا عبيطة!

ولا دي أحلامي كمان!

خالص!!

ولا هارضى برشدي أباظة من غير دماغ

أنا بس باعمل ريفرشمنت لـ جونيور رانيا :)
ولا أي حاجة تشوّه حلم كسيح

بروزته كالعادة عشان يبان مختلف يمكن!

يمكن انا نفسي مش مقتنعة انه جميل ؟

يمكن!

بس اختلافه كان بيعوّض اختلافي

الضحك على الكوخ القش كان بيزعجني!

والعجلة أم عجلتين لو حد قارنها بأي نوع عربيات !!

كنت..

بافضل مستنية أهلي بتوع فيلم سوبر مان // الجروب الطيب اللي فوق

عشان فاتوني هنا فتهت

بس أكيد هيلاقوني بقى

مش حصل كده في الفيلم

..

يمكن يتبع

نوع سيراميك الكوخ :) )

20 comments:

Anonymous said...

برواز جميل للوجع فعلا يارانيا



ربنا يسعد الجميع



رمله

نهى جمال said...

“المهم ايديه تكون واسعة!
...
" مش هايفة.. بس ساعات باحتاج أدامه اخاف فيطمني”

يطلع من كفه كمان إعصار يقحت ف الخوف
...
(فـ سِرّي) مش عايزة أكتر من انه يشوفني بجد

لو شافني هيحب الهوا اللي حواليا
...

لو بقى ! ديه المعضله للأسف

.

لما بحلم بستغربني !!!

اممممم هوا احنا الحقيقه مقضينها أحلام يافندم
بس شطبنا عشان غرقت مابعرفش أعوم

بحوبك جدا :)

مهــــا said...

أخيرا يا روني هانم
كتبت حاجة فى هذا المكان اللى بقى هادى أوى مش عارفة ليه

أما بالنسبة لكلامك فتعليقى

ربنا معاك ياللى فى بالى

شكله كده قدامه حاجات كتير اوى يعملها

:)))))

مهــــا برضه :) said...

بالنسبة لسيراميك الكوخ

عندك البرتقانى - السكري

اختارى

;)

اميرة said...

يا حبيبتي انتي تحلمي باللي على مزاجك
و ماحدش ليه فيه
واحشتيني موت
مش عارفه هو غريب ان يبقالنا احلام مشتركه و لا لاء بس هو ده اللي حاصل

العنكبوت النونو :( said...

شكلنا كده هنتكوم نحلم سوا احنا التلاتة
انا وانتي ورضوى
واللي مش عاجباه يشرب من البحر
:)

عين ضيقة said...

كلاكيت كام مرة عشان
مايظهرش الوجع خلفية للمشهد


ربما سيحمل الآتى فرحا كثيرا
ربما

ــــــــــــــــ
بحبك
عارفة انك عارفة

رانيا منصور said...

رمله !!

معقول !!!

:))

إذن مرحباً قدر دهشة أسعدتني بشدة
ليتكِ تعودين طويلاً يا شقيقة الودّ

..

رانيا منصور said...

نونااا..


أنا كمان بحووبك موووت
وطبعا الـ"واو" دي ليها حدوتة طويلة

أولها انتي
واخرها صحوبية جامدة لا مساس بها :))
بإذن الكريم الوليّ

:))

رانيا منصور said...

لأ يا مها !

أولا انتي بتقوّيه عليا يا ست هانم؟؟ :D
مش صاحبتي انا ولا ايه !!

مممممم
قال برتقالي وسكري قال!

يا لبني فـ روز يا بلاش!




دي منطقة الأحلام
والباقي ربنا يستر يا أمي
لو رسيت على كحلي فـ بتنجاني
بس كوخ
ماعنديش مانع :))

بس يعمل اللي عليه :)

رانيا منصور said...

يا رودي اللي حاصل ان القلوب اللي شبه بعض
بيتعاكسوا ف نفس النقط

فتلاقيهم ايه يا ستي بقى
نفسهم يشوفوا بعض مثلا؟؟؟؟

:))
أوي؟؟


!!

كرانيش said...

حلمك ولا فى الاحلام


دمتى سعيده كده ومزأططه

ياااااااااااارب اسعدها

آية مش هنا said...

انا لسه معلقتش .. مع اني عديت و قريتها من زمان
قريتها تاني
حلوة اوي
اوي



المهم ايده تكون واسعة

:)))

كل سنة و انتي طيبة :)

رانيا منصور said...

يا ست عنكبوت نونو

كويس ان واحدة صاحبتنا ماشافتش اسم مدونتك كانت اترعبت منك شخصيا :D

آه طبعا يشرب م البحر
لا يعجبه الكلام والحلم والقلب ده

ياااااا


لا لا هيعجبه هيعجبه ان شاء الله :))

رانيا منصور said...

أسما

يا رنّاتك قبل الفجر بساعتين :D
يا بنتي أنا امرأة عاملة باقوم
- وقت ما اروح الشغل يعني - بدري جوووداً


وحشاني أد كتير اوي اوي


المشهد خلفيته بتتبدّل
عشان طيب
وابن حلال :)

رانيا منصور said...

كرانيش الجميلة :))

مش ناويين تعملوها مرة وتطبوا مرة حلوة كده حدانا يا بنتي؟

ويسعدك ربنا الكريم :)

رانيا منصور said...

آية.. :)

وانتي طيبة ومتهنية وفرحانة يا بنوتة
قريتيها قبل كده؟؟؟!

وين!

ست الحسن said...

يا ست رانيا هانم

أنا كمان عديت من فترة وقريتها وقريت التعليقات ومشيت
وبعدين رجعت قرتها تاني

وبعدين مقدرتش أمنع نفسي أعلق بقي

.......

الحلم بتاعك مشروع ومن حقك أوي وطبيعي جداً ان فيه خناقة بينك وبين رانيا في التفاصيل وايه يصح وايه ميصحش وكمان حلوة حكاية الأفلا م الأجنبي

متتخليش عن أحلامك بس ابقى عارفة ان دايماً ليها معادل موضوعي زي بتاع السيما كده
يعني أنا متأكدة انك رحتي الغابة الواسعة قبل كده مع حد كنتي بتحبيه
تنكري

ومتأكدة انك بتطيري وبترفرفي في أوقات بردو
مينفعش تقولي محصلش

عيشي يا رانيا
سيبي مساحة للجمال والحب علشان ينتشروا وياخدووا راحتهم
فيه حاجات كتير أحلى وأجمل مستنياكي أنا متأكدة
بس انتي مستعدة انك تشوفيها وتستقبليها وتحسيها

الآخر محتاج يحس بالأمان والبراح الشديد
علشان المشاعر مبتتحركش جوه جدار الخوف أبداً

حبيبي كان بيطالبني اني أبقى حاجات كتير أوي
كنت بحاول ... دايماً بحاول ومع ذلك معرفتش حتى بس أكون مجرد نفسي

لو كان حبني زي ما انا
زي ما انا يارانيا من غير حاجة أبداً
ساعتها بس كان السحر هيبدأ
والجمال يبتدي

ربنا يسعدك

عين ضيقة said...

انتى فيييييييييييييييييييييييييييييييين؟

nudy said...

الي هذه الدرجة فقدت الاحساس بالامان ومعندكيش ثقة في تحقيق اي حلم لكن انا عاوزة اقوللك ان الحمل مسيرة يتحقق انت بس قولي يا رب