Friday, July 13, 2007

هـ ...


هافرح
واتْفائل
وهاغنّي بأعلى علوّ الصوت
لنجاة،
فيروز
وهاعيط وقت ما اعوز
وهاشهِّد كل الناس
من غير ما أحس كسوف
مين قال مكتوب على قلبي
خسوف؟
وعشان ما مْصَاحبة كلام..
أتلام !
وعشان ما بحب
أتسَب !
وعشان مانا باضحك من قلبي
وباحلم بجنينة وعجلة ومطرة وقلب
يتقال دي غريبة بتضحك ليه !!
في ايه؟!!
هافرح
واتفائل أنا – بالعِند
وهاقشّر من على جلدي الخوف
الكسْفة
والوحدة
الوِدّ الزايف
الحب الـ خايف
مش شايف
مش هاقبل اني اكون تمليك!
ولا أولّع جوا عروقي بزيت
ملِّيت !
ملّيت أسمع في كلام تمثيل
وحكاوي عشان مانا لسه ف قلبي الطيبة
باصدَّ- قها
والكل يكركر من خيبتي
طب ليه!
لو كان مكتوب ع الواحد عِيشة
هاعيش
وان كانت ضعفانة وباكية و..
مرسومة على كْريشة
فـ هاحاسب جداً
لا هاسيب انا صوت العوّ العالي يخر- بشها
ولا هارجع عما نويت
هاتلكك
وهأسَفْلِتْ في الحلم السِكة
وأظبّط عمري على المكتوب
هاقبل بالنَص صحيح
لكني هاصيغه براحتي
واغيّر خطه
واكتب بالرِقعة عشان باستسخف خط النسخ !!
هافرح،
واكتب،
واتلكك،
هاتدوّر من وِش الخنقة واحوّد
لكن بالذوق
راح اقول "ميرسي"
وهـ أنْجِج فرحة ماسمّيتهاش
وهابوس انا حلمي
وأعدي الناحية التانية
وأقول
"الحمد لله"
عدّيت
..

16 comments:

وائل فتحي said...

عدى براحتك
بس خليى يمسكها يا....عادى بقى
انا مبسوط انى وصلت للمدونه بتاعتك يارنيا

رانيا منصور said...

ياااااه..
وائل بيك فتحى بحال حاله؟؟
يا أهلاً ..
هاعدِّي طبعا أمال إيه
محدش يقدر يا عم
c'est moi.. Rania. Il n'y a pas de Fawzia
هذا والله أعلم

نورت يا عم

نهى جمال said...

رنرن

انتي عارفة بحب النص ده

وبالغصب عن الغصب

هنفرح بس بفيروز قبل نجاة
كل واحد وميوله الأول " ههه

تسلمي دايما
وهشوفك قريب هه

سلام ياقلبي

رانيا منصور said...

نهى قلبي..

وحشاني ولسه شايفاكي يا صاحبتي!

بالغصب آه يا ماما احنا بيهمنا؟

باموت فيكي..

إبـراهيم ... said...

الله ، الله ،، الله .... حقيقي حقيقي يا رانيــا مااااااااااا أجملـلك .... ، القصيدة التي انتظرت ، وتأخرت عليها :) ....


أنا آسـف اللي جيت متأخـر ....

حقيقي وحده الشـعر (هذا ) الذي يستطيع ان يزرع فينا الأمـل وحب الحيـاة ، وكل المعاني الرااااائعـــة .....

سنفرح جميعًا يا رانيا معــكِ ... وهنتلكك للفرح

وكل ما نعدي الشارع هنقول ( الحمد لله) ،، الله عليكي بجد !

قد إيه الواحد ف نعمة ما يعرفهااااش !!!

أنا هفرح إني لقيت شاعرة رااائعة زيك
وهفرح إني بعرفك ، وعرفتك ...
وهفرح إني قريت نص من نصوصك حزين ، حسيته قوي فأشجاني ، وبعدين قريت لك نص تاني زي ده بيرقص من الفرحـة ففرحت معاااكي ، قد إيه بيكون للكلمـة قيمة ومعنى لما تحسسنـــا بده كلللله ، ونحس إن ما نقوله ليس عبث ، وما نحسـه ليس هراء !!


.
.
مســاء رانيـــا يا رانيـــا

وصبااااحــــك كلللله أجمــــل

.
.
وبس

أحمد ع. الحضري said...

قصيدة ممتعة ومميزة ..
أنت شاعرة مميزة حقا
تحياتي
وشكرا على هذا النص

عنتر بن غلبان said...

النص تحفة
بجد اول مرة اتفاعل مع نص عامية من بنت
واضح اني بقيت زبون عندك



بوركت

رانيا منصور said...

ابراهيم بيك..

مرورك يا أخي غريب !! بيبهج كده!
ربنا يفرح سعادتك دايما
وإيانا يارب

عموما هاسيبك تفرح المرة دي عشان نص زي ده كل قرن ونص مرَّاية!


دعواتك يا بيك ..
مودة

رانيا منصور said...

أحمد الحضري بذات نفسه !!

يا مراحب لو نعرفو نفرشو المدونة كلام حلو :)

النص سعيد بمرورك يا احمد
وايقى تعالى

مودة صادقة..

رانيا منصور said...

عنتر بيك أو محمد صادق

أولا بمناسبة "بوركت" دي مميزة جدا على فكرة :)

نص
عامية
لبنت
مممم.. مش هاحكي ف تفرقة عنصرية واضحة ومدوية !

سعيدين بمرورك ويسعدنا استقبالكم دواماً يا مستر عنتر

مودتي..

محمد مصطفى said...

النص حلو يا رانيا
بس غريب عليكي
مش حاسه نص لرانيا منصور مش عارف ليه

غادة الكاميليا said...

ياريت كل الناس تقدر تعمل كده أنا كمان نفسي أعاند كل الناس بما فيهم نفسي أو حتى أحبنى شويه علشان برضوا أفرح شويه
ممممممممممممم
النص حاله جميله
تسلمي ياجميله

رانيا منصور said...

مادو بيك..
منور :)

أعتبر ده معناه تصريح بأني حد كئيب ومابيفرحش؟

هع!
سيبها على الله يا محمااااااد

نورت
وماتبعّدش أمال يا خوي!

رانيا منصور said...

غادة ..

تعرفي صورتك بتدخلّني لوحدها حالة!
معرفش ليه!!
وتعرفي كمان..
ساعات الواحد بيعرف يدخل بحاله
الحالة اللي حاببها :)

زقي الدنيا
بصى للسما كده
انفخي اللي ف صدرك كله
هففففففففففففف
وقولي رامية حمولي يارب
ونوريني..

faisal said...

ح اكتب بالرقعة
عشان بستسخف خط النسخ
واقول
رائع...!

دام لنا قلمك
أحمد فيصل Adrenaline

رانيا منصور said...

أحمد فيصل ..

مرور راقي دائماً :)

وأقول.. لا تغب

مودة،،