Sunday, February 17, 2008

حَبّيْتَك تـ نسيت اقولك




إوعاك تكون جيت بس يِكمل بيك طابور

ما الزحمة خفِّت من زمان
آخر حكاوي النوم بصوتَك مابْتَدِتْشِي
ازاي هانام؟

أول ميعاد برّاك طفحـ بُه الكيل
ولَمّ
فإجمَع قلوعك وانتشر جوايا
بوح
وماتتهزمش
كوباية الميّة اللي قمت اشربها شِرئتْ
لما جيت أطفيك بريقها
فـ خدتْ بالك؟
ماتطفِتش!


بابلع دموع الغيم وأغطّيك بالدعا
واسرح ف راحة يدّ بـ ِتْبُكّ الحروف
وعينين هزيلة
لم تقول
ولسان يا خايف
أو كسول
أو بيسرح ف اللي جاي


غربلتْ يومي
وخُفتْ
لا النِشارة تكون خَفِتني
مانا قلبي حبّات رُفعَها يخليها هُف تطير بـ نسمة
فَـ خد فِـ بالك
هيّ حبّة
خُد قرارك انها مش راح تدوب
وتعالى رتّب نعكشةْ عين صاحية بدري
عشان تقولك وقت توزيع الدعا والرزق
إسمع!
كون بخير..





24 comments:

عالمى ازرق said...

كوباية الميّة اللي قمت اشربها شِرئتْ
لما جيت أطفيك بريقها
فـ خدتْ بالك؟
ماتطفِتش!

كلماتك اجمل من اى تعليق عليها

- - - - - - - - -

وحشانى يابنتى جداااااا

qwert anime said...

حقيقى
البوست ده رائع
الكلمات طالعة كأنها حلم
ماحدش تدخل فيها
حاجة ملائكية

أخف دم said...

بصراحة انا مش باعلق كتير والله.. بس مع القصيدة دى مقدرتش معلقش والله
ماشاء الله يارانيا القصيدة جميلة وأحلى ما فيها انها انسيابية جداوتحسس اللى بيقرى انها بسيطة وسهلة وكلام عادى بس فعلا صعب جدا انها تتكتب بالروح والبساطة دى
صور غاية فى الروعة فعلا.. وكمان صور متشابكة مش مجرد صورة وتعدى .. انت بتنقلينا فى عالم تانى متكامل بصورك
ياريت بس توضحى تشكيل بعض الكلمات زى مثلا اسرح فى راحة يد.. مش مفهومة فى التشكيل.. وكمان تحت فيه جملتين كمان أظن لازم تشكليهم صح لانهم مكسورين وزن على تشكيلهم ده..
آسف لو طولت بس بجد النص رائع وبسيط وجميل جدا.. مع تمنباتى لك فعلا بالتوفيق.. وإلى مستوى أحسن
أشرف توفيق

مها said...

جميــلة
عجبانى
و عايزة اقول كمان
هو ليه المسافة بينها و بين اللى فاتت طويلة كوقت يعنى
و رغم كده الصلة اللى بينهم قوية
الكلام مختلف و بالعامية
يمكن نفس الحالة
ماعرفش بقى
....
فكرى يا رانيا
فيه مساحات كتيرة تتسع للحلم
قلمك فرس قوية
لا تنسيها فى مرعاها حتى لو كان واسعا جدا و جميلا جدا

اعتقد ان انطلاقها فى وديان اخرى ضرورى لها
خروجها من ما اعتادت عليه
ارتيادها مساحات اخرى
داخل حلمك
مهم

لا تنسى قلمك فى حلم واحد
حتى لو لم تمتلكى غيره فعلا
فانت تجيدين التجول فى احلام الآخرين
....

فاهمة حاجة؟؟؟

مها said...

المهم ان انا كنت داخلة اصلا اقولك
وحشانى
جدا
....
...
..
.
:(

إبـراهيم ... معـايــا said...

بحب قوي بعدما أٌرا لك، أتتبع ردود الناس، يعني نوع من اللي هوا ، مش أنا لوحدي اللي عاجباني، أو يمكن عشان حاااضــ{ة وأنا بقراها قوي، وبـدي أسمعها منـك ..........

حلوة قوووي، وحساااسة جدًا .. وذكيـة
.
.
ده مش إنتي :) ... لنتفاء اللبــس

دي القصيــدة :)

على انتظــار أيتها الجميلة

هدى said...

غربلتْ يومي
وخُفتْ
لا النِشارة تكون خَفِتني
مانا قلبي حبّات رُفعَها يخليها هُف تطير بـ نسمة
فَـ خد فِـ بالك
هيّ حبّة
خُد قرارك انها مش راح تدوب
وتعالى رتّب نعكشةْ عين صاحية بدري
عشان تقولك وقت توزيع الدعا والرزق
إسمع!
كون بخير


..

مش هقولك انها جميلة قد ما هي موجوعة وواعية ..وبتدخل القلب

...

مساك ممطر ياصديقتي الجميلة

رانيا منصور said...

جاااااارتي

متوحشاكي والله انا كمان اكتر جدا جدا
وتعليقك بيعوذض الغيبة
"قليلاً" ها..

رانيا منصور said...

qwert anime

كأنها حلم؟
ملايكة

الله عـ الكلمتين دول أصلاً

سلمتَ..

رانيا منصور said...

أشرف

جميل تعليقك
فرّحني اهتمامك بحاجات صغيّرة كده
هـ أكد عالتشكيل فوراً بإذن الكريم

أسرح فـِ راحِة يَد

الباقي حالاً
عد كثيراً

نورت عن جد
..

رانيا منصور said...

مها يا إجرام

دايماً بتفاجئيني
بيّا
بتحطيني أدامي فـ موقف محتاجة أشوفني فيه

عندك حق
عندك حق
عندك حق


عايزة
نِفسي
إدعيلي

متوحشاكي يا بنت
..

رانيا منصور said...

ابراهيم انت وهوّ
"حلوة قوووي، وحساااسة جدًا .. وذكيـة " ده انا وهي سيادتك

في مانع؟؟

سمايلي بيقوللك تشكر
وبيجولك عم تسمعها جريّب وجت ما يأذن الكريم

نشوفوك عـ خير يا افندم
...

رانيا منصور said...

هدهد

وعمرك كله منوّر يا جميلة

متوحشاكي والله
يسلم قلبك
..

كرانيش said...

انا قريت التعليقات كلها لعل وعسى الاقى حد متفق معايا فى الراى الا انى ملقتش ده ابدا

انا رايي ان القصيده اقل منك يا رانيا انتى عاوزه تطلعى من البساطه فى التركيب والتعبير واللغه والفكره لحاجات تانيه بس انا مش حساها يعنى الحجات دى ماضافتليش خااالص

ومحسيتش بيها

ياترى العيب منى انا ؟؟؟

يمكن؟؟

مش عارفه

المهم انك وحشتينى قوى متغيبيش تانى

منار جداً said...

نهارك أزرق
مش عارفة اقول إيه

إلاّ انتي بتعملي إيه في اللي بيقرالك؟


وحشتيني كتير

مهــــا said...

رانيــا
...
و انت عندك القدرة
عندك الحلم
عندك الناس

الفترة وحيدة الحلم اسلوبك علي فيها جدا فلا تنكرى فضلها أو جمالها

اندهى على الأجيال الجديدة اللى جت من أحلامك القديمة و أحلام الآخرين

و اكتبيها باسلوبك الجديد الحبيــــــب


فى أسهل من كده؟؟
;)

حياتى...

رانيا منصور said...

كرانيش يا قمر

قلبك حلو يا بنيّة
ووحشتيني كمان

فاهمة كلامك
ومهما كان هيفيدني
تشكري على قلبك الحلو

وفرحانة برأيك ونصيحتك ومرورك لابيض

مودة
..

رانيا منصور said...

منّوووووورة

باعمل ايه بس
دانا غلباااااااان

هع هع

متوحشاكي انا كمان يا صاحبتي
عن جد
..

رانيا منصور said...

مهااااا

يسلم قلبك
فاهمة

..

سنعاود البث
قريبا بإذن الله

دعواتك يا حبيبة

ســــــهـــــــــر said...

كوباية الميّة اللي قمت اشربها شِرئتْ
لما جيت أطفيك بريقها
فـ خدتْ بالك؟
ماتطفِتش!

كل مره ترشدنى ف الطريق علامه حتى لو كانت ( استفهام ) الاقيها تلملم طروف التوهه و تجاوب
الوجع منتور على طراطيف الحرف فارض نفسه بالقوه
الازرق مش بس لون جميل لكن ممكن يكون عميق زى البحر او صافى زى السما

و رغم الالم ..... كان واحشنى اقرالك جدا جدا

وحشنى حرفك جدا جدا

رانيا منصور said...

سهر..

منوّرة الأرض والجنة :)
انتي كمان لكي وَحشة يا حبيبة

لو كده بقى..
خديلك ركنة واسندي ضهرك
وريحي كتيييير
ليكي "هنا" سند :)

ومودة،،

محمد عبدالحي السيد يوسف said...

القصيد ة دي جامدة يا أخونا

أميز ما فيها الحس الشاعري اللي ممكن يتحس في كل سطر

اشرف الشافعى said...

كوباية الميةاللى قمت اشربها شرئت
لما جيت اطفيك بيريقها
ف خدت بالك
........
كده مرة واحدة
اى صورة شعرية هذه واى لحظة شعرية واتتك ورضت عنكى وجعلتك تتكتبين تلك الصورة التى ادعى انها من اروع ما قرات فى شعر العامية فى العشرة سنوات الاخيرة على الأقل
رانيا
وسامحينى على تجنب اللقب
اعكف منذ شهر على الدخول لعالم قصائدك العامية
الذى قد يراه البعض بسيطاًوسلسا وانا كذلك لكنى اجده عميقاً ومرعباص إذا ماتناولناه بمثل بساطة ماطرح
شاعرة مهمة انتى
لطكى الكثير وعليكى القليل
ولى عودة
أشرف الشافعى

إنفيزابل said...

كالعاده تتضاءل كلمات الإعجاب امام روعة مفرداتك .

دمتى مبدعه