Monday, February 16, 2009

سيبها ونام

عندي لقلبك كام هدية صغيرين
أول كلامي كام نَفَس
حطيت عليهم فرحتي ونفختهم فيك
لجل ما تطيب م البعاد
تاني كلامي حبتين مانجة وعنب
متعودين ناكل حلاوتهم سوا
ونخلي بذرتهم تنور ف العتاب
تالت كلامي خوف تهوّش ضحكتي
إياك تهوّش ضحكتي !
لساها طفرة بتنزوي لجلن تطيب
ماتت زمان
هتصير تراب
وتصير كما قال الكتاب
ضحكة بشر
أصل اللي كان قبلك بَشَر ضحكي وساب
والله ما ساب!


خليك كويس مثلما قلنا وطببني.. عليه وحده العوض
فـ ابقى العوض وحياة جمال وجه النبي
وابقى اللي طاف من أول البسمة اليمين
حتى الشمال
حبيت تتوه فـ اديتك المفتاح عشان
تعرف تعاود لما تخلص رحلتك
مش حِمل أصلا بهدلة بالله عليك
بتشيل عن الكتف الحمول
بالله تحاسب ع اللي فاضل بين صوابعي بيوجعوا
لفّت على ايديا الشنط واتكعبلت
مابقيتش عارفة اديك تشيل ولا عارفة اكمل ف المسير
ولا عارفة اكون صابرة ف سكات


طبّقني تطبيق الجنيه وادفعني واشرب حاجة ساقعة ورجّني
يمكن اكونلك نص ما يمكن تكون
وحياة غلاوتي ف عز ما بيغلى الدهب
اسمع كلامي مرة آه والتانية والعشرين وحق العِشرة لأ
لطشوا البصيرة من العينين
والقلب مكلوم م الوجيعة


لو شفت وش بنية نايمة بينتفض
ويقول كلام ما يخصهوش
ويزوم على اوجاع المشانق
يتسحب تحت الكلام
ويدوس بإيده كل حلم اتلف بشريطتين غلط
لو شفت ده
ملّس على عينيها ونشف دمعها وسيبها
ونام


..

14 comments:

Ahmed Othman said...

مش عارف
يمكن عشان كل واحد بيقرا من زاويته

أنا قريتها وطن
هو البنية اللي سايل دمعها
و هارب ضحكها

عموما مش بعيد قوي

ما هو برضه حواء وطن
و مهما نروح يمين شمال
نرجعلها
هي وطن بنص القرآن
"لتسكنوا اليها"

يبقى ما اختلفناش

معلش سرحت بعيد عن النص
لك التحية و التقدير

Anonymous said...

انا تعبت اوى على ما عرفت اوصل للمعنى الحقيقى اصل مش متعود على العاميه اللى اوى دى ..بس بصراحه تسلمى ومتشكر على التوبيك الجميل ده

Anonymous said...

يمكن ماتعرفنيش بحكم اني مغمور قوي
لكن انا عرفتك من خمس دقايق بالظبط من نصوصك
الحقيقة لماعملت البلوج سمر حطتلي مدونات عندي ماعرفش اصحابها وحضرتك منهم
وانا اسف كنت مقصر في القراية
الحقيقة انتي شاعرة اكتر من جيدة
وافتكر ان عندك اكتر من روح في الكتابة بيقولوا عيب
وشايف انه ممكن مايكونش كده
ع العموم
اعتقد ان سمر امام واسماء سليمان ووفاء صبحي وسحر البدري وياسمين انضمتلهم في نظري شاعرة محترمة
وياريت اقرالك تاني
شكراً

Anonymous said...

مدونتك رائعة وقصيدتك بالغة الجمال تنبء عن مدونة من مدونات الأدباء الحقيقيين .. تحياتى وأعد بالمتابعة

ريحانة said...

ياااااااااه يارانيا
نزلت امتى دى؟
ومشوفتهاش ازاى؟

وحشتنى اوى رانيا
رانيا اللى ساكنة حروف عارفاه وبتعجزنى عن اى كلام
فى كل مرة احاول اسيب كومنت معرفش
واقول برده
برده
مش لاقية كلام:)

soly88 said...

كلمة "بنيه" فكرتنى بقصة توفيق الحكيم يوميات نائب فى الأرياف
انت موهوبه
استمرى

أسما عواد said...

قصيدة جميلة ومختلفة
عجبنتى المدونة سوف ازورها لا حقا ان شاء الله

رانيا منصور said...

د/ أحمد عثمان

مين قال بعيد؟؟
:))

تأويلك عجبني جدا :))


ولك كل الود

رانيا منصور said...

باحث عن الصفر

وشكرالمرورك :))

رانيا منصور said...

عمرو حسن

شكرا جزيلا لك ولسمر
أتمنى اشوف اسمك مرات تانية

:))

رانيا منصور said...

دخل الشتا

هاستنى تحقيق الوعد ياافندم:)

شكرالمرورك
..

رانيا منصور said...

ريحانتي الحلوة
أم قلب عايز اكتشاف


وحشاني أد البحر
وعايزة اشوفك !

رانيا منصور said...

soly

شكرا للمرور الجميل

مودة وشكر
..

رانيا منصور said...

أسما


علها تحوز اعجابك الدائم
:))

شكرا لقلبك